Mdek Ve Ak ki Pupphli Awmtang Noeh Aw

Baibul khui oeh mdek ve ak ki pupphli (4) law hue ti hue (Awiphoe.7:1; 20:8), cenamoe thlangcuei (scientist) khi engtoe mdek ve a tum ni ti hue u. Khawsa awi Baibul a ti num ak thuem, mdekkhan thlang cueihkhi a ti num a thuem?

    Mdekkhan thlangcuei (Scientist) khieng mdek ve atum (sphericity) ni ani ti hlan oeh Baibul eng atum ni ana ti hoh hue.Ace mueihna Khawsa awi eng a ti ce ni tuh oeh mdekkhan thlangcueikhi eng mdek ve a tum ni ani ti poetoeng hue u.

    Baibul khui oeh mdek ve ak kii pupphli "the four corners of the earth" tive Baibul Cakthai khui oehtoe Awiphoe 7:1; 20:8 oeh ni hu hue.Veve mdek ak ki pupphli ak lo tingahnak amninoeh , khohli (wind)a cehnak tung pupphli a tingahnak ni. Khaw'kthli a cehnak pupphli, Kholonak tung (East) , Khotlaknak tung (West) , Axingtung (North) moe Arhamtung / Acuum tung ( South) pupphli oeh Khanthlangkhi aning dueih u, Johan eng Mangdannak ( Vision) a huh ni. Mdek ak ki amninoeh Kholo, Khotlak, Axing moe Arham ti pupphli oeh khohli a cehnak tung oeh Khanthlangkhi ang dueihnak a huhnak a kong ati ni. Veve ni Boipa Jisuh eng Khohli cehnak pupphli (Four winds of the earth) anati ni (Mathai 24:31; Marka 13:27).

    Baibul Cakkhyuem khui oehtoe mdek ve ak kii pupphli "the four corners of the earth" tive Isaiah 11:12 oeh ni hutha hue. Avoehve Hebru awina toe "KANAPH" ti hue.Hebru awi "Kanaph" ve khawzah na thlangbok awina mloen (awileh) hue u. Nambar 15:38 oehtoe Khorhi (Borders) , Isaiah 11:12 khui oehtoe ak ki pupphli ( four corners) ,Joba khui oehtoe a boetnak (ends) tinoeh moe Ezekel 7:2 khui oehtoe Rham ak kii pupphli (four corners of the land) ti hue. Isaiah 11:12 khui oeh ak ki pupphli tive Israel rham a tingahnak ni, Mdekkhan pum a tingahnak amni hue. Ace mueihna awmnoeh Isaiah 11:12 khui oehkoe ve Ezekel 7:2 khui oeh ni teok oehtoe Hebru awina toe awilung ang mueih a dongoeh KJV, NKJV, NAS moe NIV Baibul khi oehtoe rham ak ki pupphli 'four corners of the land’ ti hue. Khawmdek khan pum tingahnak amni hue, Israel rham ak ki pupphli tingahnak ni.

    Mdek ve a tum (sphericity) ni tive Baibul eng ang coei cana a nim mthehnakkhi toe (Joba 26:10; Tatukawi (Proverbs) 8:27; Phungqoenkung (Ecclesiastes) 1:6; Sam 19:6 moe Isaiah 40:22) khui oeh ni hutha hue. Isaiah 40:22 oehtoe Mdek a tum (the circle of the earth) ti hue. Ace a dawngoeh thlangcueikhi eng mdek a konglam ani sim hlan oeh Khawsa awi Baibul eng ni nam mthehkhi hoh hue.