Ngoihpeong Baok haioeh Awiceknak (White Throne Judgment)Ngoihpeong Baok Haioeh Awiceknak hoetuek oehnum a awm hlue?

     Awiphoe (Revalation) 20:11-12, A coehce Ngoihpoeng Baok moe ak khan oeh ak ngoi ce hu nueng. Mdek moe Khan na ak awmkhi a hai oehkoe eng cen unoeh, a ni cehnak hlue amawm hue. A coehce ak thi, ang xoi moe ak yoi Ngoihpoeng hai oeh angduei ce hu nueng soe Cauk hmongna awm hue.Ak chang xingnak cauk ce hmongna awm ba hue. Ak thikhi ce Cauk oeh ang yawk amueih na ani bibi phu ce awicek na awm hue. 

    Kum 1000 (Millennial) oeh Jesuh eng a uk khoen oeh Rhai (Satan) ce hlah na awm soe Mdekkhan ak cawng ak kee nak awm thlangkhi ce ni thaathang na hluekhi hue... (Awiph. 20:7-8). Khawmdek khan ak cawng ak kee hoeina cet unoeh Khawsa thlangkhi ang cun boemnak ce xer hamnang caa hlue hue u.. (Awiph. 20:9). Rhal tuknak ce I rhuet caa amlo kom soe Khawsa venna koe ak tla lo mai eng ce ni him hluekhi hue. Rhai awm ang rhui khuikhatnak maa tuili khui nace thlakna awm hlue hue.(Awiph. 20:10). Ace Rhai ce maa tuli khui na ak thlak coeng oehtoe tuh oeh ni huh khan moe Mdek ve amawm voel kom soetoe Ngoihpeong baok hai oeh awiceknak ce cutna awm hlue hue.

    Ngoihpoeng Baok hai oeh awiceknak ve Khawsa thlangna ammak awmkhi, Mdekkhan oeh a ni xing hui oeh ani bibi mueihna ce awicekna awm hlue hue (Awiph. 20:12-13). Mdekkhan oeh ani bibi mueihna Thlang boeih (ammak cangnakhi boeih) awicekna awm kom. Bibinak ak cam eng Khawsa caana amni awmtha hue, thlang thawlhna ni awm hue ti ce a ningsim rhunak doena awicekna awm hlue hue (Rom 14:10-13; 2 Korin 5:10; 1 Korin 3:10-15; Johan 5:22, 27; Kolosa 3:23-25).). Ani bibinak eng ve thawlhkhui oehkoe eng amni loersak hluekhi tha hue tice a ningsim rhu coeng oeh xingnak cauk ce hmongna awm hlue hue. Xingnak cauk khui oeh ce Jesuh ang uehnak ak cam eng Khawsa ak ue-nak moe a thongnak ce cangnak eng ak hu-khi ming ce yawk na awm hue (Rom 5:8; 3:28; 4:5; 10:9-10, 13; Eph. 2:8-9). Angming ce xingnak cauk khui oeh a awm oehtoe Jesuh khrih a hamna thi noeh a thohnak ak cangnak ak cam eng a thawh phu laiba ce sah na awm hoh hue (Rom. 3:23-24; 6:23; 2 Cor. 5:20-21). Xingnak cauk khui oeh angming ak awm doeng ni Jerusalem thai ce a lut hlue tha hue (Awph. 21:10, 27).

     Angming xingnak cauk khui oeh ammak awm toe, Jesuh eng a thawlh phu a sah pe ce ammak cangnakhi ni   (Johan 12:48; Rom 10:3). A ningming xingnak cauk khui oeh ammak awm boeih ce rhai, tawngha thawlhkhi ani awmnak huen maa tuili khui nace thlakna awm hlue hue (Awiph. 20:10,15). Veve anghih thihnak ani ti u ni (Awiphoe. 21:8).

    Ngoihpoeng baok a hai oeh awiceknak ve Khrih a hai oeh awiceknak (Bema /The judgment seat of Christ ) moe ammueih hue  (2 Kor. 5:9-10). Khrih a hai oeh awiceknak vetoe Khrihca-khi Mdekkhan oeh ani xinghui oeh ani bibi a mueihna awiceknak ni   (Rom 14:10-13; 2 Korin 5:10; 1 Korin 3:10-15; Johan 5:22, 27; Kolosa 3:23-25). Mdekkhan oeh ani xinghui oeh a ni bibi a mueihna ce ak cangna thlang boeih awicekna awm kom soetoe ani bibi phu ce paekna awm kom (1 Cor. 3:10-15). Khrih xingnak ak ta, ak cangna Khrihcakhi awm ani bibi Khawsa hai oeh amma takmahna a tlak oehtoe a bibi phu toe amhu kom soetoe a xingnak (angrhui xingnak) ce amrheng hlue hue (1 Kor. 3:14-15).

    Ace ang poeng oehtoe Khawsa eng ak thlangkhi hamna a sak pe im , Khan thai , Jerusalem thai ce lut na awm kom soe, Pa Khawsa eng thlang boeih a mikphli tui ni xut pe-khi noeh Khawsa moe mat na ni awm hlue hue ( Awiph. 21:1-4).